Murezi mwiza woza ubwenge
Ngabo dukinga ubujiji buje
Hora nkubwire njye nshize ubwira
Ubwiza bwawe mbubwire bose
Abato batuze bageze aho uri.
Ndavuga ubwiza mvuge ubwo bwema
Ndavuga umurava mvuge urukundo
Ndavuga inyifato mvuge imyato
Ndavuza impundu mpuruze bose
Zihinde induru zikaranya ibibondo.
Humura shenge uko uvunika ndabizi
Uko uzinduka kare cyane ngo uhure nanjye
Uko utoba za ngwa ntiwinube
Uko abatabizi basuzugura umurimo wawe
Uko witanga ari nako utanga
Umushahara ugatinda ucyitanga
Utigambye utinubye, utitaje utanasibye.
Ari abacuruzi n’abacuranzi
Ari abavuzi bavura indwara
Ari abo bera bazobereye
Bakora byinshi birenze ubwenge
Bose urabahiga mbikubwire
Kuko ubwo bwenge babuvomye iwawe.
Kuvuga ibyawe bisaba iminsi
Ninsubizwa ijambo nzasubira
Unsabire nanjye amasomo atsindwe
Nkomeze kurata ibyiza byawe
Kuko uri mwiza murezi nkunda.
“Murezi nkunda” was written 13 years ago. Celebrating teachers around the world.